Давлат котиби Суюнбек Космамбетов нотўғри байроқ осилганини «мутасаддилар шошганлиги» билан изоҳлади.
Бишкекда Ала-Тоо майдонида 1 январь куни кўтарилган Қирғизистон байроғи 8 январь куни алмаштирилди. Бу гал тантанали равишда парламент тасдиқланган байроқ кўтарилди.
Аввалроқ, Янги йил арафасида дизайни тасдиқланмаган байроқни кўтаришган эди. Буни ижтимоий тармоқ фойдаланувчилари сезиб қолган. Уларнинг айтишича, байроқда 40 эмас, 39 та нур бўлган ҳамда қуёш нурлари қуёшга бевосита уланган эди.
Давлат котиби Суюнбек Космамбетов 1 январь куни нотўғри байроқ осилганини «Янги йил арафасида мутасаддилар шошиб қолганлиги» билан изоҳлади.
“Тан олиш керак, янги йилни янги байроқ билан кутиб олиш эзгу ниятида мутасаддилар озгина хатоси бор байроқни кўтарган эди. Бу ҳақда кейинроқ батафсилроқ гаплашамиз”, деди у.
Жўқорғу Кенеш депутатлари 20 декабрь куни саккиз дақиқа ичида байроқни ўзгартириш тўғрисидаги қонун лойиҳасини иккинчи ва учинчи ўқишда маъқуллаган эди. Ундан аввалроқ президент Садир Жапаров давлат рамзларини ўзгартириш ғояси унга тегишли эканлигини ва парламент спикери Нурлан Шакиевни ушбу қонун лойиҳаси ташаббускори бўлишга кўндирганини тан олган эди.
22 декабрь куни президент байроқни ўзгартириш тўғрисидаги қонунни имзолаган.
